कोइराला र भारतीय प्रधानमन्त्रीबीच छलफल
By admin | August 3, 2008
१९ साउन,कोलम्बो । भारतले नेपालमा राष्ट्रिय सहमतिको सरकार बनाउन सुझाव दिएको छ । आज सार्क शिखर सम्मेलनका दौरान प्रधानमन्त्री गिरिजाप्रसाद कोइरालासंग भेटी भारतीय प्रधानमन्त्री डा.मनमोहन सिंहले उक्त सुझाव दिनुभएको हो ।
भेटपछि पत्रकारहरुसंग कुरा गर्दै प्रधानमन्त्री गिरिजाप्रसाद कोइरालाले भारतले नेपालमा राष्ट्रिय सहमतिको सरकार बनोस् भन्ने चाहना राखेको बताउनुभयो । उहाँले नेपालको शान्ति प्रक्रियामा भारतले पुर्याएको सहयोगको प्रशंशा गर्नुहुदै भविष्यमा पनि सहयोग जारी रहने अपेक्षा गर्नुभयो । भारतीय प्रधानमन्त्रीले नेपालको शान्ति प्रक्रिया निष्कर्षमा पुर्याउन जुनसुकै सहयोगको प्रतिवद्धता व्यक्त गर्नुभएको कोइरालाले जानकारी दिनुभयो । द्विपक्षीय हित तथा आर्थिक विकासका सम्बन्धमा महत्वपूर्ण छलफल भएको बताउनुभयो ।
भेटपछि भारतीय विदेशमन्त्री प्रणव मुखर्जीले नेपालको शान्ति प्रक्रियालाई सफल बनाउन जुनसुकै सहयोग गर्न भारत तयार रहेको बताउनुभयो । उहांले दुई देशका प्रधानमन्त्रीबीचको भेट आपसी सम्बन्ध विस्तारमा महत्वपूर्ण आयाम भएको टिप्पणी गर्नुभयो ।
यसैवीज कोइराला र नेकपा एमालेका वरिष्ठ नेता माधवकुमार नेपालबीच मुलुकको पछिल्लो परिस्थितिबारे टेलिफोन कुराकानी भएको छ । कोलम्बोमा रहनुभएका कोइराला र भारतीय कम्युनिष्ट पार्टी माक्र्सवादीका पूर्व महासचिव हरकिसन सिंह सुरजितको अन्त्येष्टि समारोहमा नयां दिल्ली पुग्नुभएका नेपालबीच आज बिहान कुराकानी भएको हो ।
प्रधानमन्त्री निकट स्रोतका अनुसार दुई नेताबीच आपसी सहमति बनाएर अघि बढ्नेबारे छलफल भएको थियो । कोइराला र नेपाल सहमति र सहकार्यका लागि संविधान निर्माणमा सक्रिय हुन सहमत हुनुभएको छ । नयां सरकार गठन प्रक्रियाबारे पनि दुई नेताबीच छलफल भएको छ ।
tags: Girija indiaTopics: Nepali News |
